.. authors: Codex Regius ; mailto:codex@regius.i2p .. category: journal .. comments: true .. date: 1270-01-01 0:00:00 UTC .. description: The Sayings of Hár .. link: 1270-01-01-havamal-iii .. previous: 1270-01-01-havamal-ii .. proceed: 1270-01-01-havamal-iv .. related: Hávamál I ; havamal-i Hávamál II ; havamal-ii Hávamál IV ; havamal-iv Hávamál V ; havamal-v Hávamál VI ; havamal-vi Hávamál VII ; havamal-vii Hávamál – heimskringla.no ; https://heimskringla.no/wiki/H%C3%A1vam%C3%A1l .. slug: 1270-01-01-havamal-iii .. tags: havamal, poem .. title: Hávamál III .. type: text 103. Heima glaðr gumi ok við gesti reifr, sviðr skal um sig vera, minnigr ok málugr, ef hann vill margfróðr vera, oft skal góðs geta; fimbulfambi heitir, sá er fátt kann segja, þat er ósnotrs aðal. 104. Inn aldna jötun ek sótta, nú em ek aftr of kominn: fátt gat ek þegjandi þar; mörgum orðum mælta ek í minn frama í Suttungs sölum. 105. Gunnlöð mér of gaf gullnum stóli á drykk ins dýra mjaðar; ill iðgjöld lét ek hana eftir hafa síns ins heila hugar, síns ins svára sefa. 106. Rata munn létumk rúms of fá ok um grjót gnaga; yfir ok undir stóðumk jötna vegir, svá hætta ek höfði til. 107. Vel keypts litar hefi ek vel notit, fás er fróðum vant, því at Óðrerir er nú upp kominn á alda vés jaðar. 108. Ifi er mér á, at ek væra enn kominn jötna görðum ór, ef ek Gunnlaðar né nytak, innar góðu konu, þeirar er lögðumk arm yfir. 109. Ins hindra dags gengu hrímþursar Háva ráðs at fregna Háva höllu í; at Bölverki þeir spurðu, ef hann væri með böndum kominn eða hefði hánum Suttungr of sóit. 110. Baugeið Óðinn, hygg ek, at unnit hafi; hvat skal hans tryggðum trúa? Suttung svikinn hann lét sumbli frá ok grætta Gunnlöðu.